जिल्ला युवा समिति धादिंगद्धारा युवा स्वयंसेवक समिति गठन एवं प्रशिक्षण
असार १८, २०७९
धादिंग । जिल्ला युवा समिति धादिंगको आयोजनामा युवा स्वयंसेवक समिति गठन एवं एक दिवसिय तालिम कार्यक्रम आज सम्पन्न भएको छ । युवा तथा खेलकुद मन्त्रालय, प्रदेश युवा परिषद् बागमती अन्तर्गत जिल्ला युवा समितिले सदरमुकाम धादिंगबेशीमा कार्यक्रम सम्पन्न गरेको हो ।
कार्यक्रमले जिल्ला युवा समिति धादिंगका अध्यक्ष सुनिता सिंखडाको संयोजकत्वमा २० सदस्यीय जिल्ला युवा स्वयंसेवक समितिको गठन गरेको छ । समितिमा रेडक्रस, पत्रकारका साथै नेपाल स्काउट धादिंग, राजनितिक दल र सामाजिक संघसंस्थाका प्रतिनिधि युवाहरु स्वयंसेवकका रुपमा रहनुभएको छ ।
समितिका स्वयंसेवक युवाहरुलाई प्रशिक्षक रमेश अधिकारीले विपद् व्यवस्थापन र स्वयंसेवाका विषयमा प्रशिक्षण दिनुभएको थियो । त्यसैगरी प्रमुख अतिथि एवं जिल्ला समन्वय समिति धादिंगका उपप्रमुख कुलमान वि.क.ले स्वयंसेवकका रुपमा युवाको भुमिकाका साथै जिल्ला युवा समिति र जिल्ला समन्वय समितिका आगामी कार्ययोजना लगायतका विषयमा स्पष्ट पार्नुभएको थियो । जिल्ला युवा समिति र यसको औचित्यका विषयमा समितिका अध्यक्ष सुनिता सिंखडाले बताउनुभएको थियो ।
