३९९औँ हप्तामा वाग्मती सफाइ महाअभियान
पुस १८, २०७७
काठमाडौँ । वाग्मती सफाइ महाअभियानको ३९९औँ हप्तामा तिनकुने वाग्मतीपुल क्षेत्रमा सफाइ गरिएको छ । सफाइबाट १० मेट्रिक टन फोहर व्यवस्थापन गरिएको अभियानकर्मी किशोरसिंह शाहीले जानकारी दिनुभयो । सफाइ महाअभियानका प्रमुख अभियानकर्मी नेपाल सरकारका पूर्वमुख्यसचिव लीलामणि पौडेललगायतको सक्रियतामा सफाइ भएको हो ।
सफाइमा काठमाडौंँ महानगरपालिका वातावरण व्यवस्थापन विभाग टेकुका प्रमुख हरिकुमार श्रेष्ठ, नेपाल प्रहरी, सशस्त्र प्रहरी बल, विभिन्न सामाजिक संस्थाका प्रतिनिधि, एस ट्राभल्स, वाग्मती फोहर उन्मूलन उपभोक्ता मञ्च, आलोकनगर समुदाय, अधिकार सम्पन्न वाग्मती सभ्यता एकीकृत विकास समितिका सञ्चालक सदस्य एवं कर्मचारी, काठमाडौँ उपत्यका खानेपानी लिमिटेड र वाग्मती सफाइ महाअभियानका अभियानकर्मीको पनि सफाइमा सक्रियता रहेको अभियानकर्मी माला खरेलले जानकारी दिनुभयो ।
महानगरपालिका वातावरण व्यवस्थापन विभाग, अधिकार सम्पन्न वाग्मती समिति र वाग्मती अभियानकर्मीको संयुक्त प्रयासमा फोहर गर्नेलाई गत हप्तादेखि दण्ड जरिवाना स्वरुप शुल्क उठाउन शुरु गरिएकामा यो हप्ता रु तीन हजार ५०० जरिवाना गराइएको छ । राजधानीका सबै स्थानीय तहलाई जरिवाना गर्न अनुरोध गरिएको महाअभियानले जनाएको छ । आलोकनगर वाग्मती नदी किनारमा विहान बेलुका व्यायाम गर्न आउनेका लागि उद्यानको निर्माण गरिएको छ ।
अर्को शनिवार पुस २५ गते सफाइ महाअभियानको ४०० औँ हप्तामा मीनभवन क्षेत्रमै मुख्य कार्यक्रम गरिने भएको छ । कार्यक्रमका लागि महाअभियानले सबैमा निमन्त्रणा समेत गरेको छ । तीनकुने पुल क्षेत्रको वाग्मती किनारमा बिहान ८ बजेदेखि १० बजेसम्म मुख्य कार्यक्रम गरिने महाअभियानले जनाएको छ । त्यसै दिन उपत्यकाका अन्य छ स्थानमा पनि जनचेतनामूलक अभियानसहित सफाइ गरिने अभियानकर्मी गोविन्द काफ्लेले राससलाई जानकारी दिनुभयो । मुख्य कार्यक्रममा भाग लिन नसक्नेले अन्य स्थानका कार्यक्रममा सहभागिता जनाउन सक्नेछन् ।
विष्णुमती सफाइ अभियानको ३२८ औँ हप्तामा तारकेश्वर नगरपालिका–११ शेषमती नदीबाट वडा नं। ९ सुन्दरबस्तीसम्म तारकेश्वर सफाइ अभियानको संयोजनामा काम गरिएको छ । यसैगरी काठमाडौँ महानगरपालिका–१७ खुसीबुँ नयाँपुल क्षेत्रमा पनि सफाइ गरिएको संयोजक शोभाकान्त पाण्डेले राससलाई जानकारी दिनुभयो । यस क्षेत्रको सफाइ बाल उद्यान सेवा समितिका अध्यक्ष राम श्रेष्ठको नेतृत्वमा भएको हो ।
विष्णुमती नदीको मुहान क्षेत्र अर्थात् बूढानीलकण्ठ नगरपालिका वडा नं। ४ लुडेखोलाको दोभान क्षेत्रमा अभियानकर्मी रामकुमार श्रेष्ठको नेतृत्वमा सफाइ गरिएको छ । यसैगरी आज उपत्यकाका गुह्येश्वरीमाथिको वाग्मती, रुद्रमती, मनोहरा, चक्रपथको उत्तरी र पश्चिमी भेग, ललितपुरको गोदावरी खोलामा पनि जनचेतनासहित विशेष सफाइ अभियान सम्पन्न भएको छ ।
विसं २०७० जेठ ५ गते वाग्मती सफाइ महाअभियान शुरु भएको थियो । महाअभियान शुरु भएपछि प्रत्येक हप्ताको शनिबार बिहान सातबजेदेखि नौ बजेसम्म निरन्तर सफाइ हुँदै आएको छ । जाडो, वर्षा, चाडपर्व, भूकम्पआदि प्रकोप र कोरोना महामारीका बेलासमेत स्वास्थ्य सुरक्षाका विधि अपनाएर स्वतःस्फूर्त रुपमा देशका लागि दुई घण्टा स्वयंसेवा भन्ने नाराका साथ सफाइ भइरहेको छ ।
वाग्मती सफाइ महाअभियान शुरु भएपछि यसका सहायक नदी, उपत्यका विभिन्न स्थानलगायत देशका मुख्य मुख्य शहरमा गरी १०६ स्थानमा सफाइ अभियान चलिरहेको छ । वाग्मती सफाइ महाअभियान ४०० हप्तामा प्रवेश गर्न लाग्दा पनि नदीमा आशातीत सफलता हासिल हुन नसकेको गुनासोसमेत सुनिने गरेको छ ।
