कांग्रेसले बोलायो केन्द्रीय समिति बैठक
कार्तिक २१, २०७८
काठमाडौं । विकसित पछिल्लो राजनीतिक घटनाक्रमको समीक्षा र पार्टीको १४ औं महाधिवेशनको तयारीबारे छलफल गर्न नेपाली कांग्रेसले केन्द्रीय समितिको बैठक बोलाएको छ ।
कात्तिक २८ गते दिउँसो १ बजे पार्टीको केन्द्रीय कार्यालय सानेपामा बैठक बोलाइएको कांग्रेस कार्यालयका मुख्य सचिव कृष्णप्रसाद पौड्यालले जानकारी दिए ।
मंसिर अन्तिम साता महाधिवेशन गर्ने तयारी गरेको कांग्रेसको अधिकांश जिल्लामा अधिवेशन हुन सकेको छैन । क्रियाशील सदस्यताको बिवाद टुंगाएर जिल्ला अधिवेशन गर्नेबारे छलफल हुने कांग्रेसले जनाएको छ । पटक पटक सर्दै आएको कांग्रेसको महाधिवेशन मंसिर २७ देखि गर्नेगरी तोकिएको छ ।
बैठकमा केन्द्रीय कार्यसमितिका पदाधिकारी, केन्द्रीय सदस्यहरु तथा आमन्त्रित केन्द्रीय सदस्यहरुलाई उपस्थित हुन भनिएको छ ।
