बोलोग्नालाई ३–० ले हराउँदै नापोली शीर्ष स्थानमा उक्लियो
कार्तिक १२, २०७८
काठमाडौं । लोरेन्जो इनसिग्नेको दुई गोलप्रेरित नापोलीले गएराति बोलोग्नालाई ३–० ले हराउँदै इटालियन सिरी ‘ए’ को शीर्ष स्थानमा उक्लिएको छ ।
घरेलु टोली नापोलीले १८औं मिनेटमा फबियनको गोलबाट अग्रता लिएको थियो ।
४१औं मिनेटमा इनसिग्नेले पेनाल्टीमा गोल गर्दै अग्रता दोब्बर बनाए । ६२औं मिनेटमा इनसिग्नेले पेनाल्टीमै अर्को गोल थपेपछि नापोलीले तीन अंक पक्का गरेको थियो ।
इनसिग्नेले जारी सिजन चार गोल गरेका छन् । त्यो सबै गोल इनसिग्नेले पेनाल्टीमै गरेका हुन् ।
लिगका दशौं चरणको खेल सकिँदा नापोलीले २८ अंक जोडेको छ । एसी मिलानको पनि समान २८ अंक छ । तथापि गोलअन्तरमा नापोली शीर्ष स्थानमा छ ।
२१ अंक जोडेको साविक विजेता इन्टर मिलान तेस्रो र १९ अंक जोडेको एएस रोमा चौथो स्थानमा छ । पराजित बोलोग्ना १२ अंक जोडेर १२औं स्थानमा छ ।
