एमसीसीबारे बज्न थाल्यो विज्ञापन
भदौ १४, २०७८
काठमाडौं । मिलेनियम च्यालेन्ज कर्पोरेसन (एमसीसी)ले नेपालमा कार्यान्वयन हुने परियोजनाबारे विज्ञापन (टीभीसी) प्रसारण गर्न थालेको छ । जनताहरुका माझ एमसीसी बारे भ्रम फैलाइएकाले त्यसलाई हटाउनका लािग विज्ञापन प्रसारण सुरु गरिएको बताइएको छ । यद्यपी यस परियोजना कार्यान्वयन नेपालको हीन बिपरित हुन्छ भन्दै आपत्ति जनाउनेले भने थप विरोध शुरु गरेका छन् ।
यसरी विज्ञापन प्रसारण गरेर जनस्तरमा गलत सूचना सम्प्रेषण गरी जबरजस्ती एमसीसी कार्यान्वयन गर्न खोजिएको उनीहरुको आरोप छ । एमसीसीको विज्ञापनमा ‘देशलाई फाइदा हुने’ , ‘एससीसीको बेवास्ता गर्न नहुने’ , ‘एमसीसीले देशलाई नै फाइदा हुने’ , ‘एमसीसीको अनुदानले बिजुली प्रसारणलाइन बनेपछि जलविद्युत आयोजनाको बिजुली आफ्नै देशमा खपत गर्न सकिने र बाहिर पनि पठाउन सकिने’ तथा ‘भरपर्दो बिजुली भएपछि देशको आर्थिक समृद्धिको जग बलियो बन्ने’ लगायतका सन्देश समेटिएका छन् ।
एमसीसी परियोजना देशको भविष्यको लागि गरिएको लगानी भएको सन्देश पनि टीभीसीमा छ । हाल एउटा मात्रै राष्ट्रिय टेलिभिजनमा प्रसारण भइरहेको सो विज्ञापन अब छिट्टै नेपाल टेलीभिजनबाट पनि बजाउने तयारी भइरहेको बताइएको छ ।
