नेपाल नेतृत्वको पार्टीमा दोस्रो पंक्तिका नेताहरुले साथ नदिने
भदौ २, २०७८
काठमाडौं । नयाँ दल दर्ताको प्रक्रियाका लागि माधव कुमार नेपाल नेतृत्वको टोलि यतिबेला निर्वाचन आयोग पुगेको छ । नेता नेपालको नेतृत्वमा नेकपा एमाले समाजवादी पार्टी दर्ता गर्ने निर्णयसँगै नेकपा एमाले फुटेको हो । यद्यपी यस दौरानमा निकै अघिदेखि नेपाललाई साथ दिने दोस्रो पंक्तिका नेताहरु नयाँ पार्टी दर्ताको लागि जाने निर्णयबाट असन्तुष्ट भएका छन् ।
यस असन्तुष्टिसँगै उनीहरु नयाँ पार्टीमा नजाने भएका छन् । नेता नेपाललाई एमाले पदाधिकारी र स्थायी कमिटीको ठूलो हिस्साले साथ नदिने भएको स्रोतले जनाएको छ । तीन उपाध्यक्ष युवराज ज्ञवाली, भीम रावल र अष्टलष्मी शाक्यले नेता नेपालको साथ छाडेका छन् । उपमहासचिव घनश्याम भुसाल सचिवहरु गोकर्ण विष्ट, योगेश भट्टराई र भीम आचार्य, स्थायी कमिटी सदस्य सुरेन्द्र पाण्डे र अनुशासन आयोगका प्रमुख अमृत बोहरा नयाँ दलमा नजाने स्रोतले जनाएको छ ।
स्थायी कमिटी सदस्यद्वय वेदुराम भुसाल र मुकुन्द न्यौपाने भने नेता नेपालसँगै नयाँ दलमा हुनेछन् । केन्द्रीय कमिटीको पनि ठूलो हिस्सा एमाले समाजवादीमा नजाने यो समूहका नेताहरुको दाबी छ । यद्यपि यो समूह तत्काल अध्यक्ष केपी शर्मा ओली नेतृत्वको समूहमा पनि जाने सम्भावना कम रहेको नेताहरुले बताएका छन् ।
अध्यादेश ल्याउन लगाएर माधवकुमार नेपालले र नेताहरुलाई कारबाही गरेर अध्यक्ष ओलीले पार्टी फुटाउन खोजेको भन्दै उपाध्यक्ष युवराज ज्ञवाली भन्छन्, ‘व्यक्तिले गरेको गल्तीको सजाय पार्टीलाई दिन सकिन्न । हामी एकताकै पक्षमा छौं ।’
