एनआरएनएलाई सेयर बजारमा भित्र्याउन गरिएको अध्ययन प्रतिवेदन तयार , अर्थ मन्त्रालयमा छलफल हुँदै
असार १६, २०७८
काठमाडौं । नेपाल धितोपत्र बोर्डले विगत लामो समय देखि आफ्नो नीति तथा कार्यक्रममा सेयर बजारमा गैरआवासीय नेपालीलाई भित्र्याउने बुँदा राख्दै आएकोमा अब सो विषयको टुंगो लाग्ने भएको छ । सेयर बजारमा गैरआवासीय नेपाली (एनआरएनए) लाई भित्र्याउन नेपाल धितोपत्र बोर्डले गरेको अध्ययन सकिएसँगै यो विषयले पूर्णता पाउने भएको हो ।
लगानीको मोडल, लगानीकर्ताले लैजाने प्रतिफल तथा विभिन्न कानूनी जटिलताहरुका विषयमा अध्ययन गरिएको र सो बारे अर्थ मन्त्रालयसँग छलफल गर्ने तयारीमा जुटेको बोर्डले जनाएको छ ।
बोर्डका अध्यक्ष भिष्मराज ढुंगानाका अनुसार आगामी साता सम्ममा अर्थ मन्त्रालयमा छलफल हुने र सो छलफल अध्ययनले दिएको सुझावको आधारमा हुनेछ । सोहि छलफलका आधारमा गैर आवासीय नेपालीलाई पुँजी बजारमा भित्र्याउने विषयमा टुंगो समेत लाग्नेछ ।
यो विषय पूर्णताको नजिक पुगेको र आगामी आवबाट नै एनआरएनएलाई भित्र्याउन सकिने सम्भावना प्रबल रहेको अध्यक्ष ढुंगानाको भनाई छ ।
