एसियाली खेलकुद : हारमा पनि नेपालको बहादुरी

हाङचउ । डर थियो, कतै नेपाली पुरुष भलिबल टोली इरानविरुद्धको खेलमा बुधबार साह्रै नराम्रोसँग पराजित हुने त होइन रु आखिरमा इरान विश्व भलिबलकै सबैभन्दा ठूलो महाशक्ति राष्ट्र हो । एसियामा त इरानको जगजगी चल्छ । अझ इरान पछिल्ला दुई संस्करणको एसियाली खेलकुदमा पुरुष भलिबलमा स्वर्ण जितेको टिम हो ।

त्यस्तोमा खेलाडीलाई प्रोत्साहित गर्न नेपालका प्रशिक्षक हान अबिङले भनेका थिए, इरानविरुद्ध ८ अंक हात पार्नु नै जितसरह हो । नेपाल त्यही इरानविरुद्ध पराजित त भयो, तर तीनै सेटमा आठभन्दा माथिको अंक जोड्न पनि सफल रह्यो । यी त भए केही हदसम्म भावनात्मक कुरा । यता कोर्टमा नेपाली टिम हाङचउ एसियाली खेलकुदमा लगातार दोस्रो खेलमा पराजित हुँदै प्रतियोगिताबाट बाहिरिएको छ । नेपाल समूह ‘बी’ को आफ्नो दोस्रो खेलमा सोझो सेटमा हारेको हो ।

नेपालको लिग चरणको अन्तिम खेलमा इरान २५–९, २५–१५, २५–१३ ले विजयी रह्यो । नेपाल यसअघि बहराइनसँग हारेको थियो । यसपल्टको प्रतियोगिता वरीयता निर्धारण गर्नका लागि थप खेल नहुने भएको हुनाले नेपाल लगातार दुई खेल गुमाएर घर फर्कन लागेको हो । प्रतियोगितामा सहभागी कुल टिमलाई ६ समूहमा विभाजन गरिएको छ । प्रत्येक समूहबाट दुई टिमले अघिल्लो चरणमा प्रवेश पाउने छन् ।

चाइना टेक्सटाइल कभर्डहलमा भएको खेलमा नेपालले पहिलो सेट सजिलै गुमाएको थियो । त्यसपछिका दुई सेटमा भने केही बलियो प्रतिद्वन्द्विता पेस गर्न सफल रह्यो । नेपालले दोस्रो सेटमा दुईपल्ट अग्रता लिएता पनि त्यसलाई कायम गर्न सकेको थिएन ।

खेललाई लिएर नेपाली टिमका कप्तान मानबहादुर श्रेष्ठले भने, ‘सबैलाई थाहा छ, इरान कति बलियो टिम हो भनेर । उनीहरूविरुद्ध खेल्न पाउनु पनि खुसीको उपलब्धि हो । यस खेलमा नेपाली टिममा के कस्ता कमजोरी छन् । ती सबै मज्जाले थाहा पाउन सकिने भयो ।’