मुगुमा ५६ र हुम्लामा २४ जनामा कोरोना पुष्टि
भदौ ६, २०७९
मुगु । हिमाली जिल्ला मुगु र हुम्लामा पनि कोरोना भाइरस (कोभिड–१९) संक्रमण देखिएको छ । ज्वरो आउने‚ टाउको दुख्नेजस्ता लक्षण भएका बिमारीलाई एन्टिजेन परीक्षण गर्दा मुगुमा ५६ जना र हुम्लामा २४ जनामा कोरोना पुष्टि भएको जिल्ला स्वास्थ्य सेवा कार्यालयले जनाएको छ । चौथो लहरको कोरोना महामारीपछि ३ सय १० जना बिरामीलाई एन्टिजेन परीक्षण गर्दा मुगुमा ५६ जनामा कोरोना संक्रमण पुष्टि भएको जिल्ला स्वास्थ्य सेवा व्यवस्थापक उमेश गौतमले बताए ।
यसैगरी हुम्लामा करिब ४९ जनामा स्वास्थ्य परीक्षण गर्दा २४ जनामा कोरोना देखिएको हुम्ला जिल्ला स्वास्थ्य सेवा व्यवस्थापक प्रेमबहादुर सिंहले बताए । कोरोना पुष्टि भएका बिरामीहरूलाई होम आइसोलेसनमा बसेर औषधि उपचार गर्न सुझाव दिइएको छ । मुगुमा अक्सिजनको अभाव नभए पनि हुम्लामा भने अक्सिजनको अभाव देखिएको छ ।
गत वर्ष हेरेन्डेक नामक संस्थाले मुगु जिल्ला अस्पतालमा अक्सिजन प्लान्ट जडान गरिदिएपछि कोरोना संक्रमितलाई अक्सिजन उपलब्ध गराउन सहज भएको जिल्ला स्वास्थ्य सेवा कार्यालयले जनाएको छ । हुम्लामा मिनी अक्सिजन प्लान्ट अर्थात पाइप लाइनमार्फत बिरामीलाई अक्सिजन दिने व्यवस्था गरिएको छ
