भारतीय टेलभिजनकर्मी रसिक दवेको निधन
साउन १४, २०७९
मुम्बई। हिन्दी तथा गुजराती टेलिभिजन कार्यक्रम तथा धारावाहिकका लोकप्रिय कलाकार रसिक दवेको ६५ वर्षको उमेरमा शुक्रवार राति निधन भएको छ । किड्नीको समस्याका कारण मुम्बईमा उपचारकै क्रममा उनको निधन भएको बताइन्छ । उनी पछिल्लो १५ दिनदेखि अस्पतालमा भर्नँ भएर उपचार गराइरहेका थिए । टेलिभिजनको क्षेत्रमा दवे एक लोकप्रिय कलाकारको रुपमा स्थापित थिए । उनले संस्कारः धरोहर अपनों की, सीआईडी, कृष्णा जस्ता विभिन्न लोकप्रिय टेलिभिजन कार्यक्रममा काम गरेका थिए । उनले अभिनेत्री केतकी दवेसंग विवाह गरेका थिए ।
केतकी तथा रसिक रियालिटी शो नच बलिएमा पनि सहभागि भएका थिए भने विभिन्न लोकप्रिय कार्यक्रममा समेत देखा परिसकेका थिए । उनले थुप्रै नाटकहरुमा समेत काम गरेका थिए । निर्माता जेडी मजीठियाका अनुसार दवे पछिल्ला केही वर्षदेखि मृगौलाको डाइलासिस गराइरहेका थिए । दुई साताअघि मात्रै उनलाई अस्पतालमा भर्ना गरिएको थियो । केतकी तथा रसिकका दुई सन्तान रिद्धि तथा अभिषेक छन् । रसिकको शनिवार अन्तिम संस्कार गरिँदैछ ।
