माइतीघरमा सहकारी पीडितको ‘अर्धनग्न’ विरोध प्रदर्शन
बैशाख १५, २०८२
काठमाडौं । सहकारी पीडितहरूले सोमबार काठमाडौंको माइतीघर मण्डलमा अर्धनग्न भएर प्रदर्शन गरेका छन् । सहकारी संस्थाहरूको रकम अपचलनबाट पीडित बचतकर्ताहरूले सरकारले आफ्ना मागप्रति बेवास्ता गरेको भन्दै आक्रोशित भएका छन् ।
प्रदर्शनको क्रममा उनीहरुले सहकारी सञ्चालकको सम्पत्ति जफत गरी बचत रकम फिर्ता गर्न माग गरेका थिए । महिनौंदेखि सडक आन्दोलनमा उत्रिएका उनीहरूले सरकारले माग सम्बोधन नगरेको गुनासो गरेका छन् ।
सहकारीहरूको वित्तीय अनियमितताले हजारौं बचतकर्ता आर्थिक संकटमा परेका छन् । पीडितहरूले न्याय र आफ्नो रकम फिर्ताको माग गर्दै आन्दोलनलाई तीव्र बनाउने चेतावनी दिएका छन् । सहकारी पीडितले यस अघि पनि न्यायको माग गर्दै बेला बेलामा प्रदर्शन गर्दै आएका छन् ।
