बालेन सोझो भएको भन्दै बाङ्गो बन्न हर्कको अनुरोध
चैत्र २१, २०८१
काठमाडौं । धरान उपमहानरपालिकाका मेयर हर्क साम्पाङले काठमाडौं महानगरपालिकाका मेयर बालेन्द्र शाह (बालेन) लाई कार्यशैली परिवर्तन गर्न सल्लाह दिएका छन् । उनले मेयर शाह ‘सोझो’ हुँदा अरूले फाइदा उठाइरहेको आशय व्यक्त गरेका छन् ।
‘बालेन जी, तपाईं सोझो हुनुहुन्छ, अलि बाङ्गो बन्नुस्,’ मेयर साम्पाङले भनेका छन् । बिहीबार प्रमुख प्रशासकीय अधिकृतको कार्यकक्षमा सरोज गुरागाईंको पुनरागमनपछि मेयर साम्पाङले बालेनलाई सो अनुरोध गरेका हुन् ।
मेयर शाहले गुरागाईंलाई कार्यालय प्रवेश गर्न नदिन महानगर कार्यालय परिसरमा नगर प्रहरीको टोली परिचालन गरेका थिए । यसक्रममा वडाध्यक्ष र कर्मचारीले नगर प्रहरीसँग संघर्ष गर्दै गुरागाईंलाई कार्यकक्षसम्म पुर्याए ।
मेयर शाह भने प्रमुख प्रशासकीय अधिकृतको कार्यकक्षमा ताला लगाएर हिँडेका थिए । जब ताला तोड्न खोजियो, महानगर प्रहरीले रोक लगाए । यसक्रममा ढोकाको सिसा पनि फुटेको थियो ।
