काठमाडौंका सीडीओ भन्छन्– तीनकुने क्षेत्र तनावग्रस्त छ, नियन्त्रणमा लिने प्रयास भइरहेको छ
चैत्र १५, २०८१
काठमाडौं । काठमाडौंका सीडीओ ऋषिराम तिवारीले तीनकुने क्षेत्र तनावग्रस्त रहेको बताएका छन् । राजावादीलाई प्रदर्शन गर्न प्रशासनले सो क्षेत्र तोकेको थियो । तर, प्रदर्शनकारीहरू अराजक बनेर निषेधित क्षेत्र तोड्न लागेपछि स्थिति तनावग्रस्त भएको थियो । प्रदर्शनकारीहरूले मिडिया हाउस र निजी घरहरूमा तोडफोड तथा आगजनी गरेका छन् । सीडीओ तिवारीले अवस्था नियन्त्रणमा लिने प्रयार भइरेको बताएका छन् ।
तीनकुनेस्थित अन्नपूर्ण पोस्ट दैनिकको कार्यालयमा राजावादी प्रदर्शनकारीहरूले ढुंगामुढा गरेका छन् । प्रदर्शनकारीले बाहिरबाट ढुंगामुढा गर्दा अन्नपूर्ण पोस्टकका कर्मचारीहरू भने भवनको नवौँ तलामा रहेका छन् । एक पत्रकारले आफूहरू नवौँ तलामा रहेको र तलबाट ढुंगामुढा भइरहेको जानकारी दिएका छन् । उनका अनुसार अन्नपूर्ण पोस्टनजिकै रहेको भवनमा प्रदर्शनकारीले तोडफोड गरेका छन् । पेन्टागन कलेजनजिकै रहेको मार्बल हाउसको भवनमा व्यापक क्षति पुगेको छ ।
