दक्षिण एसियामै पहिलो पटक हुन लागेको एपीटी विज्ञ समूहको बैठक नेपालमा बस्ने तय

काठमाडौं । एसिया प्यासिफिक टेलिकम्युनिटी वायरलेस ग्रुप (एडब्लूजी) को बैठक दक्षिण एसियामै पहिलो पटक नेपालमा आयोजना हुँदैछ । आउँदो सोमबार, ३१ मार्चदेखि ४ अप्रिलसम्म चल्ने उक्त बैठकको तयारी लगभग अन्तिम चरणमा रहेको व्यवस्थापनको जिम्मेवारी पाएको नेपाल दूरसञ्चार प्राधिकरणका सहायक प्रवक्ता डा. प्रदिप पौड्यालले जानकारी दिए ।

कार्यक्रममा सञ्चार तथा सूचना प्रविधि मन्त्रालय र प्राधिकरण दुवै होस्टको रूपमा रहेका छन् । विश्वका ३८ देशको साझा मञ्चको रूपमा रहेको एपीटीको यो बैठकले नयाँ प्रविधि, त्यसका लागि चाहिने फ्रिक्वेन्सी र नियामकीय ढङ्गबाट अध्ययन गर्छ । सम्बन्धित सबै देशका फ्रिक्वेन्सी सम्बन्धी विज्ञहरू यो बैठकमा सहभागी हुने डा पौड्यालले बताए । होटेल याक एन्ड यतीमा आयोजना हुने यो कार्यक्रममा भर्चुअल समेत गरी चार सय जना जतिको सहभागिता हुने अपेक्षा गरिएको छ । एपीटीलाई अन्तर्राष्ट्रिय दूरसञ्चार सङ्घ (आईटीयू) मा नै निर्णायक भूमिका खेल्ने निकायको रूपमा लिइन्छ । जसमा जापान, कोरिया, चीन, अस्ट्रेलिया लगायतका देशहरू रहेका छन् । प्रविधि र फ्रिक्वेन्सी सम्बन्धी अध्ययन अनुसन्धान केन्द्रित यही निकायले मोबाइल सेवाको ७०० मेगाहर्ज ब्यान्ड पहिचान गरेर आईटीयूलाई सिफारिस गरेको थियो ।

डा पौड्यालका अनुसार आसन्न बैठकमा सिक्सजी, स्याटलाइट, स्पेक्ट्रम हार्मोनाइजेसन, आईएमटी, नयाँ मोबाइल प्रविधि कुन फ्रिक्वेन्सीमा चलाउने भन्ने लगायतका विषयमा छलफलहरू हुनेछन् । कार्यक्रमा सदस्य राष्ट्रका सरकारी प्रतिनिधि मात्र नभएर रिसर्च इन्टिच्युट र विज्ञहरूको समेत सहभागिता हुने बताइएको छ । एपीटीको उच्च प्राविधिक कमिटीको रूपमा रहेको एडब्लूजीले निष्कर्षको रूपमा दिने सुझाव एपीटीमार्फत आईटीयूमा जानेछन् ।