खस्किँदो बीमा व्यवसाय : सात महिनामा साढे ८ अर्बको बीमा ‘पोलिसी सरेन्डर’

काठमाडौं । आर्थिक वर्षको ७ महिना अर्थात् माघमसान्तसम्म जीवन बीमा कम्पनीहरुको पोलिसी सरेण्डर (बीमा त्याग) बढेको छ । चालु आर्थिक वर्ष २०८१/०८२ को सात महिनामा १४ जीवन बीमा कम्पनीका ६२ हजार ५ सय २३ बीमितले बीमा पोलिसी त्याग गरेका छन् । बीमितले ८ अर्ब ५९ करोड २ लाख २ हजार रुपैयाँ बराबरको बीमा त्यागेका हुन् ।

गत पुस जीवन बीमा कम्पनीहरुको करिब ५४ हजार बीमितले ७ अर्ब ६६ करोड पुगेको पोलिसी सरेन्डर गरेका थिए । माघ महिना मात्रै जीवन बिमा सरेन्डर १५.०४ प्रतिशतले बढेको छ । यो अवधिमा सबैभन्दा धेरै लाइफ इन्स्योरेन्स कर्पोरेसनको छ । यो कम्पनीको माघ महिनासम्म २ अर्ब ५९ करोड रुपैयाँ बराबरको बिमालेख सरेन्डर भएको छ । त्यस्तै, नेपाल लाइफको २ अर्ब ३६ करोड बराबरको बिमालेख सरेन्डर भएको छ।

त्यस्तै हिमालयन लाइफ इन्स्योरेन्सको ४ हजार १३७ वटा बीमा पोलिसी सरेन्डर भएर ३७ करोड ८१ लाख रुपैयाँ रकम बाहिरिएको छ । नेसनल लाइफको ३ हजार ७२० वटा पोलिसीबापत ५५ करोड १५ लाख रुपैयाँ सरेन्डर भएको छ ।सूर्यज्योति लाइफ इन्स्योरेन्सको ३४ सय ८३ वटा बीमा पोलिसी सरेन्डर हुँदा ४६ करोड ९९ लाख रुपैयाँ बाहिरिएको छ । मेट लाइफको २ हजार ९५ वटा बीमा पोलिसीबापत २४ करोड १२ लाख रुपैयाँ त्याग भएको छ ।

राष्ट्रिय जीवन बिमा कम्पनीको ७८ करोड, एशियन लाइफको ५४ करोड, आइएमई लाइफको १२ करोड र सिटिजन्स लाइफको १४ करोड बीमालेख सरेन्डर भएका छन् । सानिमा रिलायन्सको १५ करोड, प्रभु महालक्ष्मी लाइफको १२ करोड, रिलायबल नेपालको ६ करोड र सन नेपाल लाइफको ४ करोड रुपैयाँबराबरको बिमालेख सरेन्डर भएको नेपाल बीमा प्राधिकरणको तथ्यांकले देखाएको छ ।
अर्थतन्त्र चलायमान नभएर व्यक्तिको आम्दानीमा समेत त्यसको प्रभाव परेको छ ।