नेप्सेमा ४९ अंकको वृद्धि, मौद्रिक नीतिको यो व्यवस्थाले उचालियो बजार

काठमाडौँ । मौद्रिक नीतिको एउटा व्यवस्थाले सेयर बजारमा उत्साह ल्याएको छ । साताको अन्तिम कारोबार हुने दिन बिहीबार नेप्से परिसूचक ४९.१५ अंकले बढेको हो । यो सँगै बजार २८१५.०४ अंकमा पुगेको छ । परिसूचक बढेको नेप्सेमा कारोबार रकम समेत बढेर ११ अर्ब ३९ करोड रुपैयाँ पुगेको छ ।

आजको बजारमा २४४ कम्पनीको शेयर कारोबार भएकोमा १८६ कम्पनीको मूल्य बढेको छ । ५२ कम्पनीको मूल्य घट्दा ६ कम्पनीको मूल्य स्थिर रहेको छ । आज बजारमा सबैभन्दा धेरै वृद्धि बैंकिङ समूहको भएको छ । सो समूहको परिसूचक ३.३२ प्रतिशतले बढेको हो । त्यस्तै उत्पादन तथा प्रशोधनमूलक उद्योग परिसूचक पनि २.९१ प्रतिशत विन्दुले बढेको छ । आज सबै उपसूचक बढ्दा उल्लेखित बाहेक ६ उपसूचकको वृद्धि १ प्रतिशत भन्दा धेरै देखिएको छ ।

आज बजारमा ४ कम्पनीको मूल्यमा सकारात्मक सर्किट ब्रेकर लाग्यो । यसरी सर्किट लेभलमा कारोबार भएका कम्पनीहरूमा गार्डियन माइक्रो लाइफ इन्स्योरेन्स, अपर हेवाखोला जलविद्युत्, सिन्धु विकास बैंक र दोर्दीखोला जलविद्युत् कम्पनी रहेका छन् । भुगोल इनर्जीको ७.१७ प्रतिशतले घटेको मूल्य नै आजको सर्वाधिक गिरावट रह्यो ।

बजारमा आज पनि हिमालयन पुनर्बीमा सर्वाधिक कारोबार हुने कम्पनी बनेको छ ।

मंगलबार नेपाल राष्ट्र बैंकले मौद्रिक नीतिको समीक्षा गर्दै बैंकले प्रवाह गर्ने असल कर्जाको प्रोभिजनिङ दर १.१० प्रतिशतबाट घटाएर १ प्रतिशत कायम गरेको थियो । यो व्यवस्थाका कारण बैंकहरुको नाफा करिब साढे ४ अर्ब रुपैयाँले बढ्ने अनुमान गरिएको छ । बैंकको अनुकूलमा मौद्रिक नीति आउँदा बैंकिङ क्षेत्रमा यसको प्रभाव देखिएको हो । बैंकसँगै समग्र बजारमा समेत आज सुधार भएको छ ।