आर्मीलाई हराउँदै पुलिसको महिला टोली टाइगर कप भलिबलको इलिमिनेटरमा
माघ १५, २०८१
काठमाण्डौ । त्रिभुवन आर्मी क्लबलाई हराउँदै नेपाल पुलिस क्लबको महिला टोली टाइगर कप राष्ट्रिय तथा अन्तर्राष्ट्रिय क्लब च्याम्पियनशिपको इलिमिनेटरमा पुगेको छ ।
पोखरा रङ्गशालाको भलिबल कोर्टमा आज भएको पहिलो खेलमा पुलिसले आर्मीलाई ३–० को सोझो सेटमा हरायो । पुलिसले पहिलो सेट २५–१८, दोस्रो सेट २५–२१ र तेस्रो सेट २५–१९ ले जित्यो ।
‘हार्ने समूह’ बाट ६ अङ्क जोडेर शीर्ष स्थानमा रहँदै पुलिस इलिमिनेटरमा प्रवेश गरेको हो । पुलिसले यसअघि थाइल्यान्डको ट्राभल इन्क्वायरी युनाइटेडलाई हराएको थियो । त्रिभुवन आर्मी क्लब र ट्राभल इन्क्वायरी एक खेलअघि नै प्रतियोगिताबाट बाहिरिएका छन् ।
