प्रिमियर लिगमा आर्सनल विजयी, म्यानचेस्टर सिटी एस्टन भिल्लासँग हार्यो
पुस ७, २०८१
काठमाण्डौ । इग्लिस प्रिमियर लिग फुटबलमा गएराति आर्सनल, न्यु क्यासल, नटिङघम फरेस्ट र एस्टन भिल्ला विजयी भएका छन् । आर्सनलले क्रिष्टल प्यालेसलाई ५–१ गोलले हरायो । उसका लागि जिसस, हाभार्ट, मार्टिनेली र राइसले गोल गरे । आर्सलन १७ खेलमा ३३ अङ्कसहित तेस्रो स्थानमा पुगेको छ ।
यस्तै ब्रेन्टफोर्डलाई २–० गोलले हराउँदै नटिङघम फरेस्ट ३१ अङ्कसहित चौथो स्थानमा पुगेको छ । अर्को खेलमा एस्टन भिल्लाले म्यानचेस्टर सिटीलाई २–१ गोलले हराएको छ । भिल्लाका डुरान र रोग्रेसले गोल गरे । सिटीका फोडेनले इन्जुरी समयको तेस्रो मिनेटमा सान्त्वना गोल गरे ।
पछिल्लो समय खराब प्रदर्शन गरिरहेको सिटी २७ अङ्कसहित छैठौँ स्थानमा छ । २८ अङ्क भएको भिल्ला पाँचौ स्थानमा छ । गएरातिकै अर्को खेलमा न्युक्यासलले इपस्वीच टाउनलाई ४–० गोलले हरायो भने ब्राइटन र वेस्टह्यामले बराबरी खेलेका छन् ।
