आज काठमाण्डौ उपत्यकाका पालिकामा सार्वजनिक बिदा
साउन १३, २०८१
काठमाण्डौ । काठमाण्डौ उपत्यकाभित्रका सबै पालिका र पालिका मातहतका निकायमा आज सार्वजनिक बिदा दिइएको छ । कीर्तिपुर नगरपालिकाका मेयर राजकुमार नकर्मीको निधनको शोकमा काठमाण्डौ उपत्यका मेयर्स फोरमले काठमाण्डौ, ललितपुर र भक्तपुरका पालिकामा सार्वजनिक बिदा दिने निर्णय गरेको हो ।
लामो समयदेखि मिर्गौलाको समस्याबाट पीडित कीर्तिपुरका मेयर नकर्मीको उपचारको क्रममा अस्ति बिहीवार बेलुका निधन भएको थियो । नकर्मी २०७९ को पालिका चुनावमा कीर्तिपुर नगरपालिकाको मेयरमा निर्वाचित हुनुभएको थियो ।
