बैंकहरुमा थुप्रियो दुई अर्ब ५५ करोडको सुन
साउन १, २०८१
काठमाडौं । अहिले आमउपभोक्ताबाट सुनको माग कम भइरहेको छ। यही कारण बैंकहरूमा सुन थुप्रिएको हो। बैंकहरूमा आएको सुन व्यवसायीहरूले उठाइरहेका छैनन्।
बैंकरहरूका अनुसार अहिले बैंकमा २१० किलो सुन थुप्रिएको छ। बजारमा अहिले सुनको मूल्यले ऐतिहासिक रेकर्ड बनाइरहेको छ। गत जेठ २५ गते सुनले हालसम्मकै उच्च मूल्यको रेकर्ड बनाएको थियो।
सो दिन सुनको मूल्य प्रतितोला एक लाख ४५ हजार रूपैयाँ पुगेको थियो। दुई वर्षभन्दा केही बढी समयमै सुनको मूल्य ४४ प्रतिशतले बढेको हो। गत २०७८ चैत ८ गते सुनको भाउले दोस्रोपटक एक लाख रूपैयाँ नाघेको थियो।
मूल्य उच्च भएको, आमउपभोक्ताको क्रय शक्ति घटेको र आर्थिक गतिविधि सुस्तिएको कारण सुनको मागमा कमी आइरहेको छ।
