डेंगु संक्रमणबाट बचाउने खोप विकास गरेको भारतीय कम्पनीको दाबी
चैत्र ६, २०८०
काठमाडौ । भारतको एक कम्पनीले डेंगुबाट बच्नका लागि खोप बनाएको दाबी गरेको छ । हैदराबाद स्थित इन्डियन इम्यूनोलोजिकल्स लिमिटेडले संसारमै पहिलो पटक डेंगु भाइरसबाट बच्ने खोप तयार पारेको दाबी गरेको हो । कम्पनीका प्रवन्ध निर्देशक डा. आनन्द कुमारले सबै कुरा ठिक ढंगले अघि बढेमा परीक्षण पुरा भएर खोप सन २०२६ सम्म बजारमा आउने दाबी गरेको बीबीसी हिन्दीले जनाएको छ ।
उनका अनुसार खोपको पहिलो चरणको परीक्षण सफल भएको छ । दोस्रो र तेस्रो चरणको परीक्षण छिट्टै सुरु हुँदैछ । संसारमा अहिलेसम्म डेंगु भाइरस प्रतिरोधी खोपको परीक्षण सफल हुन सकेको छैन । यसका धेरै भेरियन्ट हुने भएकाले खोप विकासमा चुनौती देखिएको छ ।
एक रिपोर्ट अनुसार विश्वभर हेरक वर्ष १० करोड मानिसलाई डेंगु हुने गरेको छ । जसमध्ये साढे तीन करोड भारतीय हुने गरेका छन् । नेपालमा पनि डेंगुको संक्रमण बढ्दै गएको छ । गर्मी सुरु भएसँगै विभिन्न क्षेत्रमा यसले प्रकोपकै रुप लिने गरेको छ ।
