बुढिगण्डकी नदिले बगाउँदा धादिङका एक जना शिक्षक बेपत्ता
भदौ १६, २०८०
धादिङ । धादिङको नीलकण्ठ नगरपालिका–१३ का बासु तिमल्सिना बुढिगण्डकी नदीमा डुबेर बेपत्ता भएका छन् ।
त्रिपुरासुन्दरी गाउँपालिका–१ नरसिंह धाममा दर्शन गर्न गएका तिमल्सिना नदीमा पौडी खेलेर नुहाउने क्रममा बेपत्ता भएका हुन् । जिल्ला प्रहरी कार्यालय धादिङका प्रहरी उपरिक्षक गौतम मिश्रका अनुसार पौडी खेल्दै साथीहरुसँग पालैपालो भिडियो बनाउँदै गर्दा एक्कासी नदीमा बेपत्ता भएका हुन् ।
अहिले प्रहरी, स्थानीयहरुले खोजी गरिरहेका छन् । स्थानीय स्तरमा पाइने डोरी र ट्युवको सहायताले नदीमा खोजी भइरहेको प्रहरी उपरिक्षक मिश्रले जानकारी दिए।
खोजी कार्यका लागि सदरमुकाम धादिङबेसीबाट सशस्त्र प्रहरीको गोताखोर टोली घटनास्थलतर्फ जादैछ । बेपत्ता भएका तिमल्सिना नीलकण्ठ नगरपालिका–१३ स्थित पञ्चकन्या माध्यामिक विद्यालयका शिक्षक हुन्।
