घट्न थाल्यो गोलभेडाको मूल्य
भदौ १०, २०८०
काठमाडौँ । प्रतिकिलो डेढसय हाराहारी पुगेको गोलभेडाको थोक मूल्य घट्न थालेको छ । कालिमाटी फलफुल तथा तरकारी बजार विकास समितिका अनुसार महँगीको मारमा परेको गोलभेडाको भाउ विस्तारै घट्न थालेको हो ।
विकास समितिकाअनुसार आज ठूलो नेपाली गोलभेडाको थोक मूल्य प्रतिकिलो ८५ रुपैयाँ छ । हिजो पनि यही मूल्यमा कारोबार भएको गोलभेडा विहीबार भने प्रतिकिलो १०० रुपैयाँमा कारोबार भएको थियो ।
यस्तै, आज भारतीय ठूलो गोलभेडाको मूल्य प्रतिकिलो १०५ रुपैयाँ छ । विहीबार भारतीय ठूलो गोलभेडाको थोक मूल्य प्रतिकिलो १५० रुपैयाँ थियो । यसबाहेक, आज सानो लोकल गोलभेडाको मूल्य प्रतिकिलो ५१ रुपैयाँ छ ।
