कैलालीमा लागूऔषध कारोबार बढ्दा प्रहरीले निगरानी बढाए
असार २१, २०८०
धनगढी । कैलाली जिल्ला कारागारमा कैदीबन्दी भेट्न आउनेहरूमाथि प्रहरीले विशेष निगरानी बढाएको छ । यो हठात् गरेको भने होइन । धनगढी–६ चटकपुरका २५ वर्षीय भीम बोगटीलाई असार १५ मा प्रहरीले धनगढीस्थित कारागारको गेटबाट पक्राउ गर्यो । जबर्जस्ती करणी मुद्दामा जेलमा रहेका आफन्त ३१ वर्षीय करन बमलाई भेट्न उनी आएका थिए ।
करनका लागि उनले ल्याएको स्याम्पुको बट्टामा १३ ग्राम खैरो हेरोइन बरामद भएको थियो । यस्तै घटना असार १० मा पनि भएको थियो । धनगढीकी ५० वर्षीया कमलादेवी अवस्थी कारागार गेटबाटै खैरो हेरोइनसहित पक्राउ परे । लागूऔषधकै मुद्दामा कारावास सजाय भुक्तान गर्दै रहेका २१ वर्षीय छोरा ओमप्रकाशलाई उनले बिस्कुट लगिदिएकी थिइन । बिस्कुटभित्र ५४० मिलिग्राम लागूऔषध लुकाएको भेटिएको थियो ।
