मूर्रा भैंसीको प्रसंगले प्रतिनिधिसभामा तनाव
जेष्ठ २२, २०८०
काठमाडौँ । प्रधानमन्त्री पुष्पकमल दाहालले भारत भ्रमणका क्रममा मूर्रा भैंसी ल्याउनेबारे स्पष्टीकरण दिएका छन् । उनले यो विषयमा सात वर्षअघि नै कुरा भएको जानकारी दिए । प्रतिनिधिसभाको बैठकमा प्रधानमन्त्री दाहालले भारत भ्रमणबारे जानकारी दिने क्रममा भैंसीको प्रसंगबारे कुरा उठाएका हुन् ।
भैंसीको कुरा अहिले भएको होइन । आजभन्दा सात वर्षअघि नै मूर्रा भैंसी ल्याउने कुरा भएको रहेछ । मान्छेले अहिले मलाई भैंसी चढाएर हिँडेका छन्‚ प्रधानमन्त्री दाहालले भने ।
यो भैंसीको प्रसंग उठेपछि प्रतिनिधिसभामा होहल्ला भएको छ । प्रधानमन्त्री दाहाललाई प्रश्न सोध्ने क्रममा राष्ट्रिय स्वतन्त्र पार्टीका सांसद शिशिर खनालले भारत भ्रमणमा गएका प्रधानमन्त्री भैंसी चढेर आएको भनेपछि सत्तापक्षका सांसदले आपत्ति जनाएका थिए । माओवादी केन्द्रका प्रमुख सचेतक हितराज पाण्डेले उक्त शब्द असंसदीय भएको भन्दै रेकर्डबाट हटाउने माग गरेका थिए ।
तर एउटा सांसदले बोलिरहेको बेलामा अर्काले आपत्ति जनाएको भन्दै एमाले र रास्वापाका सांसदहरूले उठेर प्रतिवाद गरेका थिए । एमाले नेता सूर्य थापाले सत्ता पक्षले दादागिरी गरेको भन्दै नियमापत्ति भएको बताए ।
