काभा महिला भलिबल : नेपालले बंगलादेशसँग खेल्ने
जेष्ठ ९, २०८०
काठमाडौं । काभा अन्तर्राष्ट्रिय महिला भलिबल प्रतियोगिताको आफ्नो दोस्रो खेलमा नेपालले मंगलबार बंगलादेशको सामना गर्दैछ।
खेल राष्ट्रिय खेलकुद परिषद् राखेप को कभर्ड हलमा दिउँसो ३ बजे शुरु हुनेछ। पहिलो खेलमा सोमबार नेपालले किर्गिस्तानलाई ३–० को सोझो सेटमा हराएको थियो।
प्रतियोगिता अन्तर्गत मंगलबारको अर्को खेलमा भारत र किर्गिस्तानबीच प्रतिस्पर्धा हुनेछ। यस्तै उज्वेकस्तान र माल्दिभ्सबीच तथा श्रीलंका र कजाकस्तान पनि प्रतिस्पर्धा हुनेछ।
नेपाल भलिबल संघको आयोजनामा जारी प्रतियोगितामा नेपाल, भारत, श्रीलंका, बंगलादेश, माल्दिभ्स, किर्गिस्तान, उज्वेकस्तान र कजाकस्तान गरी आठ टोलीको सहभागिता छ।
समूह एमा घरेलु टोली नेपाल सहित भारत, बंगलादेश र किर्गिस्तान छन्। समूह बीमा श्रीलंका, माल्दिभ्स,उज्वेकिस्तान र कजाकस्तान छन् ।
प्रतिस्पर्धामा राउण्ड रोविन लिगपछि शीर्ष २ टोलीले सेमिफाइनलमा र पुछारमा रहेका दुई टोलीले वरीयताका लागि प्रतिस्पर्धा गर्नेछन्।
