तनहुँमा १ मा स्वर्णिम वाग्ले अग्रस्थानमा
बैशाख ११, २०८०
काठमाडौँ । प्रतिनिधिसभा सदस्य उपनिर्वाचनअन्तर्गत तनहुँ १ मा जारी मतगणना अनुसार हालसम्म राष्ट्रिय स्वतन्त्र पार्टीका उम्मेदवार स्वर्णिम वाग्ले ७२९३ मत ल्याउँदै अग्रस्थानमा छन् । यस्तै नेपाली कांग्रेसका गोविन्द भट्टराईले ३२३४ मत प्राप्त गरेका छन् । तेस्रो स्थानमा रहेका नेकपा एमालेका सर्वेन्द्र खनालले भने २१३४ मत प्राप्त गरेका छन् ।
जस अनुसार कांग्रेसका उम्मेदवार भट्टराई र एमालेका उम्मेदवार खनालले हालसम्म प्राप्त गरेको मतको योगफल ५३६८ भन्दा धेरै रास्वपाका उम्मेदवार वाग्लेले प्राप्त गरेका छन् । निर्वाचन आयोगका अनुसार हाल भानु नगरपालिका र आँबुखैरेनी गाउँपालिकाको मतगणना भइरहेको छ । सोमबार बिहानदेखि मतगणना सुरु गरिएकोमा पछिल्लफ परिणाम अनुसार रास्वपाका वाग्लेले अछिन्दै आएका छन् ।
तनहुँ १ मा आइतबार भएको उपनिर्वाचनमा ६३ हजार ७ सय ५७ मत खसेको निर्वाचन कार्यालयले जनाएको छ । निर्वाचन कार्यालय अनुसार तनहुँ १ मा १ लाख २३ हजार ३ सय ५ जना मतदाता छन् ।
२ दिनभित्र अन्तिम मतपरिणाम सार्वजनिक गर्ने आयोगको तयारी छ । प्रतिनिधिसभा सदस्यका लागि आइतबार भएको उपनिर्वाचनमा तनहुँ १ मा करिब ५२ प्रतिशत मत खसेको छ । विभिन्न ९ राजनीतिक दलले उम्मेदवार चुनावी मैदानमा रहे पनि तनहुँ १ को उपनिर्वाचनमा नेपाली कांग्रेस, नेकपा एमाले र राष्ट्रिय स्वतन्त्र पार्टीबीच मुख्य प्रतिस्पर्धा हुने भएको छ ।
