स्टयाण्ड–अप कमेडीयन हिमेश पन्त धादिङ क्षेत्र नम्बर १ बाट चुनाव लड्ने
अशोज १२, २०७९
काठमाडौं । स्टयाण्ड–अप कमेडी रियालिटी शो ‘कमेडी च्याम्पियन’का विजेता हिमेश पन्त आगामी मंसिर ४ गते हुने प्रतिनिधि सभा निर्वाचनमा उम्मेदवार बन्ने भएका छन । उनी रवि लामिछाने नेतृत्वको ‘राष्ट्रिय स्वतन्त्र पार्टी’बाट चुनाव लड्ने तयारीमा लागेका हुन । पार्टीले हिमेशलाई धादिङ क्षेत्र नम्बर १ बाट प्रतिनिधि सभातर्फ उम्मेदवार सिफारिस गरेको छ । धादिङ जिल्ला समितिले पन्तसहित अन्य केहीको नाम केन्द्रमा सिफारिस गरेको थियो । यद्यपि, अन्य सबै उम्मेदवारले आफूलाई समर्थन गरेको हिमेशले बताएका छन ।
हिमेशको घर सोही निर्वाचन क्षेत्रमा पर्छ । हिमेश केही समययता रविसँग भेटघाट र छलफलमा थिए । राजनीतिमा आउने आफ्नो पहिल्यैदेखिको सोँच रहेको बताए । सोही कारण आफूले कमेडीमा पनि राजनीति र सामाजिक विषयमा बढी ‘सटायर’ गरिरहेको उनले बताए ।
‘अहिले पोलिटिकल फ्रस्टेसन एकदमै धेरै छ । रवि दाइले स्वतन्त्र पार्टी शुरु गर्दा सकारात्मक भाव ल्याउँछ भन्ने महसुस भयो’, उनले भने, ‘उहाँसँग भेटघाट भयो, छलफल भयो । आफू पनि राजनीतिमा आउने सही समय हो जस्तो लाग्यो ।’सो क्षेत्रबाट उम्मेद्वार बन्न ८/१० जना इच्छुक रहे पनि अन्तिममा सबैले आफूलाई समर्थन गरेपछि उम्मेद्वार बन्ने पक्का भएको हिमेशले बताए । पहिलो कमेडी च्याम्पियनका विजेता हिमेशले पछिल्लो समय चलचित्रमा समेत अभिनय गरिसकेका छन् ।
