नेपाली काँग्रेसको सातै प्रदेश कार्यसमिति पदाधिकारीबीच छलफल

काठमाडौं। नेपाली काँग्रेसको समानुपातिकतर्फका उम्मेदवार छनौटका लागि सातै प्रदेश कार्यसमितिको पदाधिकारीबीच छलफल राखेको छ । आईतवार (आज) बिहान बालुवाटारमा सातै प्रदेशका सभापतिसहित पदाधिकारीहरू अनौपचारिक रूपमा छलफल गर्न लागेको प्रधानमन्त्री शेरबहादुर देउवाको सचिवालयले जनाएको छ । निर्वाचन आयोगमा प्रतिनिधि सभा र प्रदेश सभाका लागि समानुपातिकतर्फ उम्मेदवार सूची बुझाउन आइतबार र सोमबार निर्वाचन आयोगले समय दिएको छ । प्रदेशहरूबाट प्रदेशतर्फ समानुपातिक सूची तयार पार्ने र आजै प्रतिनिधि सभातर्फ समानुपातिक सूची तयार गर्न केन्द्रीय संसदीय बोर्डको बैठक बस्ने तयारी छ ।

देउवाको सचिवालयले दिएको जानकारीअनुसार आइतबार दिउँसो २ बजे बालुवाटारमा संसदीय दलको बैठक बस्नेछ। उक्त बैठकमा समानुपातिक उम्मेदवार सूची बनाउनेबारे छलफल गर्नेछ । कांग्रेसको केन्द्रीय संसदीय बोर्डले पूर्णता पाएको छैन। बोर्डमा पदाधिकारीसहित नेता रामचन्द्र पौडेल मात्रै छन्। त्यसकारण कांग्रेस सभापति देउवाले छलफलमा पदाधिकारी र पूर्वपदाधिकारीलाई बोलाउँदै आएका छन । कांग्रेसले २०७४ मा समानुपातिक सांसद भएकालाई यसपालि नदोर्होयाउने भएको छ। कांग्रेस विधानअनुसार पनि समानुपातिक सांसद फेरि लगत्तै हुने अर्को चुनावमा समानुपातिकतर्फ सांसद बन्न पाउँदैन।