४ दिने भ्रमणका लागि चिनियाँ कांग्रेस अध्यक्ष ली काठमाडौंमा

काठमाडौं । चिनियाँ कांग्रेसका अध्यक्ष ली चान्सुको ४ दिने भ्रमण कार्यक्रमसहित सोमबार अपराह्न काठमाडौं उत्रिएका छन । उनलाई स्वागत गर्न त्रिभुवन अन्तर्राष्ट्रिय विमानस्थलमा सभामुख अग्निप्रसाद सापकोटा पुगेका थिए । ली नेतृत्वको भ्रमण दलमा सय जना रहेको बताइएको छ ।  संसद सचिवालयले दिएको जानकारी अनुसार ली नेतृत्वको टोली सुरुमा होटोल सोल्टी जानेछ । त्यसपछि, सभामुख अग्निप्रसाद सापकोटासँग शिष्टाचार भेट गर्न बानेश्वरस्थित संसद भवन जाने कार्यक्रम छ । उक्त भेटमा सबै दलका सचेतक तथा नेपाल–चीनमैत्री संसदीय समूहको टोली हुने जनाइएको छ ।त्यस लगत्तै सभामुख सापकोटाले आयोजना गरेको रात्रि भोजमा शरिक ली नेतृत्वको टोली सोल्टी होटल जाने कार्यतालिका रहेको छ ।

त्यस्तै, मंगलबार बिहान ली ले बानेश्वर स्थित संसद भवनमा राष्ट्रिय सभाका सदस्य गणेश तिमिल्सेनासँग भेटवार्ता गर्ने बताइएको छ । त्यस लगत्तै एमाले अध्यक्ष केपी ओली र माओवादी अध्यक्ष पुष्पकमल दाहाल प्रचण्डसँग छुटाछुटै भेटवार्ता गर्ने कार्यक्रम रहेको छ । दुई पार्टीका अध्यक्षसँग भेटपछि ली र परराष्ट्रमन्त्री नारायण खड्का बीच सोल्टी होटलमा भेट हुने कार्यक्रम रहेको छ । साँझमा ली नेतृत्वको टोली प्रधानमन्त्री शेरबहादुर देउवासँग भेट गर्न बालुवाटार जाने कार्यक्रम रहेको छ ।
प्राप्त सूचना अनुसार बुधबार ली अलि फुर्सदिला देखिन्छन्। उक्त दिन उनको र राष्ट्रपति विद्यादेवी भण्डारीबीच भेट हुने एउटा मात्र कार्यक्रम रहेको छ । ली को टोली बिहीबार बिहान दक्षिण कोरिया प्रस्थान गर्नेछ ।