राष्ट्र बैंकले आज २५ अर्बको ट्रेजरी बिल सोझै खरिद गर्ने
भदौ ९, २०७९
काठमाडौँ। नेपाल राष्ट्र बैंकले आज बिहीबार २५ अर्व रुपैयाँको नेपाल सरकारका ट्रेजरी बिल सोझै खरिद गर्नका लागि बोलकबोल गर्ने भएको छ। केन्द्रीय बैंकले बुधबार एक सूचना प्रकाशित गरी बोलकबोल बिहीबार दिउँसो २ बजेसम्म अनलाइन माध्यमबाट गरिने जानकारी दिएको हो ।
ट्रेजरी बिलको खरिद मिति भने भदौ १० शुक्रबारलाई तोकिएको छ । राष्ट्र बैंकको मौद्रिक व्यवस्थापन विभागका अनुसार नेपाल सरकारका ट्रेजरी बिलको भुक्तानी मिति २०७९ पुस मसान्तसम्म रहेको छ । काउन्टरपार्टीले बिक्री गर्न चाहेको तोकिएको भुक्तानी मिति भएका नेपाल सरकारका ट्रेजरी बिलको सिरिज नम्बर र परिणाम उल्लेख गर्नुपर्नेछ।
काउन्टरपार्टीले बिक्री गर्न चाहेको ट्रेजरी बिल्सको परिमाणको मूल्यमा बोलकबोल गर्नुपर्नेछ। यसैगरी काउन्टरपार्टीले बिक्री गर्न चाहेको नेपाल सरकारको ट्रेजरी बिल्सको परिमाण १ करोड रुपैयाँ वा १ करोड रुपैयाँले भाग लाग्ने दरले खरिद आह्वान गरेको रकमसम्म बोलकबोल गर्न सक्नेछन् तर एउटा सिरिजको ट्रेजरी बिलका लागि एउटामात्र बोलकबोल गर्नुपर्नेछ।
