आइओसीबाट घटेर आयो पेट्रोलियम पदार्थको मूल्य
साउन १, २०७९
काठमाडौं। भारतीय आयल कर्पोरेसन (आइओसी)ले नेपाललाई पठाउने पेट्रोलियम पदार्थको मूल्य घटेर आएको छ । अन्तर्रांष्ट्रिय बजारमा इन्धनको कच्चा मूल्य घटेपछि भारतले पनि पेट्रोलियम पदार्थको मूल्य घटाएर पठाएको हो। नेपाल आयल निगमका अनुसार पेट्रोलमा प्रतिलिटर १५ रुपैयाँ ७६ पैसा र डिजलमा प्रतिलिटर १६ रुपैयाँ ५६ पैसा घटेर आएको हो। यसबाट आयल निगमलाई राहत पुगेको छ ।
इन्धनको मूल्य बढेसँगै आयल निगमले चर्को घाटा ब्यहोर्नुपरेको बताउँदै आएको छ । आयल निगमलाई सहज बनाउन सरकारले कर घटाएको थियो तरपनि निगम निरन्तर घाटामै रहेको बताउँदै आएको छ । आइओसीलाई तिर्ने रकम नभएपछि निगमले वाणिज्य बैंक र सरकारबाट करिब १० अर्ब ऋण लिने तयारी गरेको छ ।
भारतबाट इन्धनको मूल्य घटेर आए पनि तत्काल पेट्रोलियम पदार्थको मूल्य समायोजन गर्ने अवस्था नरहेको निगमले जानकारी दिएको छ । निगमका प्रवक्ता विनितमणी उपाध्यायले यससम्बन्धमा जानकारी दिन निगमले अपराह्न पत्रकार सम्मेलन गर्न लागेकाे बताए।
