साउन ९ बाट मन्दाकिनी हाइड्रोपावरको आईपीओ आउँदै
साउन १, २०७९
काठमाडौं। मन्दाकिनी हाइड्रोपावर लिमिटेडले साउन ९ गतेदेखि सर्वसाधारणका लागि साधारण सेयर (आईपीओ) निष्कासन गर्ने भएको छ। कम्पनीले ११ लाख ७६ हजार ७३ कित्ता आईपीओ निष्कासन गर्न लागेको हो। निष्कासन गर्न लागेको कुल सेयरमध्ये २ प्रतिशत (२३ हजार ५२१ कित्ता) सेयर कर्मचारीहरूका लागि र ५ प्रतिशत (५८ हजार ८०३) कित्ता सामूहिक लगानी कोषको लागि सुरक्षित गरिएको छ भने बाँकी रहेको १० लाख ९३ हजार ७४८ कित्ताका लागि सर्वसाधारणले आवेदन दिन सक्नेछन्।
लगानीकर्ताले न्यूनतम १० कित्तादेखि अधिकतम १ लाख कित्तासम्म आवेदन दिन सक्नेछन्। आईपीओमा आवेदन दिने समय साउन १२ गतेसम्म छ। यस समयभित्र माग बमोजिम आवेदन नपरेमा साउन २३ गतेसम्म थप हुनेछ। आईपीओ निष्कासनका लागि गराएको रेटिङमा केयर रेटिङ नेपालले कम्पनीलाई केयर एनपी डबल बी प्लस (आईएस) रेटिङ प्रदान गरेको छ । यसले दायित्व बहन गर्ने क्षमतामा औषत जोखिम रहेको संकेत गर्दछ।
कम्पनीको आईपीओ निष्कासन तथा बिक्री प्रबन्धकमा बिओके क्यापिटल मार्केट लिमिटेड छ। लगानीकर्ताले बिक्री प्रबन्धकसँगै नेपाल धितोपत्र बोर्डबाट अनुमति लिइ सी–आस्वा सेवामा सहभागी बैंक तथा वित्तीय संस्थाहरूबाट पनि आवेदन दिन सक्नेछन्।
