आजबाट ६ दिनसम्म विद्यालयहरु
बैशाख २८, २०७९
काठमाडौं । स्थानीय तह निर्वाचनको लागि आज देखि ६ दिनसम्म विद्यालयहरु वन्द हुने भएको छ । प्रायसः सामुदायिक विद्यालयहरुमा मतदान केन्द्र राखिएको, कतिपय शिक्षकहरु निर्वाचनमा खटिएको र कतिपय मतदान गर्न जिल्ला जानुपर्ने भएका कारण आजबाट विद्यालयहरु बन्द गरिएको हो ।
सरकारले भने वैशाख ३० गते मात्र विदा दिने निर्णय गरेको हो । यद्यपी शिक्षा तथा मानव स्रोत विकास केन्द्रले ७७ वटै शिक्षा विकास तथा समन्वय इकाइलाई मतदान केन्द्र कायम भएका विद्यालयमा २८ गतेदेखि ३० गतेसम्म तीन दिन बिदा दिन निर्देशन दिएको थियो ।
वैशाख ३१ गते शनिबार परेको र सरकारले जेठ १ गतेदेखि आइतबारको दिन पनि सार्वजनिक विदा दिने निर्णय गरेकाले आइतबार पनि विदा हुनेछ । साथै जेठ २ गते बुद्ध जयन्ती परेकाले सो दिन पनि सार्वजनिक बिदा हुनेछ । त्यसकारण आजबाट ६ दिनसम्म विद्यालयहरु बन्द हुने भएका हुन् ।
