सरकार सार्वजनिक विद्यालय सुधारमा लागेको छ : शिक्षामन्त्री पौडेल

काठमाडौँ । शिक्षा, विज्ञान तथा प्रविधिमन्त्री देवेन्द्र पौडेलले सरकार सार्वजनिक विद्यालयलाई सुधार गर्न लागिपरेको बताउनुभएको छ । आज काठमाडौँ महानगरपालिका भित्रका विभिन्न सार्वजनिक विद्यालयको अनुगमन गर्ने क्रममा मन्त्री पौडेलले नेपालको सार्वजनिक शिक्षामा भौतिक पूर्वाधारको सुधार, कानूनी सुधार र शिक्षण सिकाइ प्रक्रियामा सुधार आवश्यक रहेको औँल्याउँदै सरकार त्यसप्रति लागिपरेको जानकारी गराउनुभयो ।

उहाँले निजी क्षेत्रले पनि शिक्षालाई नाफा आर्जन गर्ने थलोका रूपमा नलिइ न्यूनतम शुल्कमा पढाउनुपर्नेमा जोड दिनुभयो । सार्वजनिक सुधारको अभियान कामपाबाट सुरु भएको उल्लेख गर्दै निजी क्षेत्रलाई पनि राज्यले नै स्वीकृति दिएको हुनाले सँगै लिएर जाने धारणा उहाँले राख्नुभयो ।

“निजी र सार्वजनिकलाई जुधाउने होइन, निजी र सार्वजनिकलाई सँगै लैजाने र निजीलाई थप बढी ध्यान दिनुपर्छ”, उहाँले भन्नुभयो । सोही अवरसमा उहाँले सरकारले कम्तीमा तीन वर्षभित्रमा सार्वजनिक शिक्षा सुधारमा देखिने गरी काम गर्ने प्रतिबद्धतासमेत व्यक्त गर्नुभयो । मन्त्री पौडेलले सार्वजनिक सुधार मन्त्रालयको प्राथमिकतमा रहेको बताउँदै आगामी आर्थिक वर्षमा शिक्षा क्षेत्रमा बजेट वृद्धि हुने पनि विश्वास व्यक्त गर्नुभयो ।