अफ्रिकी राष्ट्र मरिससको फुटबल टिम आज नेपाल आउँदै
माघ १०, २०७८
काठमाडौं । नेपाली राष्ट्रिय फुटबल टिमसँगको मैत्रीपूर्ण फुटबल खेल्न मरिससको फुटबल टिम आज नेपाल आइपुग्ने भएको छ ।
अखिल नेपाल फुटबल संघ ९एन्फा० ले मरिससको टोली आज बिहान नेपाल आइपुग्ने जनाएको छ । एन्फाका अनुसार अफ्रिकी राष्ट्र मरिससको टिम आज बिहान सवा ११ बजे नेपाल आइपुग्ने छन् । नेपाल र मरिससबीच त्रिपुरेश्वरस्थित दशरथ रंगशालामा यही माघ १५ र १८ गते दुई मैत्रीपूर्ण खेल हुँदैछ । एन्फाले फिफा ब्रेकमा नेपाल र मरिससबीच खेल खेलाउन लागेको हो । मरिसस फिफा वरीयतामा १७२ औं स्थानमा छ ।
नेपालले पहिलो पटक अफ्रिकी राष्ट्रसँग मैत्रीपूर्ण फुटबल म्याच खेल्न लागेको हो । कोभिड-१९ को तेस्रो भेरियन्ट ओमिक्रोनको संक्रमण बढिरहेको बेला हुन लागेको नेपाल र मरिससबीचको मैत्रीपूर्ण खेलमा दर्शकलाई अनुमति दिने वा नदिने निर्णय भइसकेको छैन । एन्फा महासचिव इन्द्रमान तुलाधरले मैत्रीपूर्ण खेलमा एक तिहाई दर्शक राख्ने र बिना दर्शक खेलाउने भन्ने निर्णय केही दिनमा हुने जानकारी दिए ।
मरिसससँगको मैत्रीपूर्ण खेलका लागि नेपाली फुटबल टिमलाई मुख्य प्रशिक्षक अबदुल्लाह अलमुताइरीले प्रशिक्षण गराएका छन् ।
नेपालले गत असोजमा माल्दिभ्समा साफ च्याम्पियनसिप खेलेपछि पहिलो पटक अन्तर्राष्ट्रिय फुटबल खेल्न लागेको हो । साफ च्याम्पियनसिपको फाइनलमा नेपाल भारतसँग ३-० ले पराजित हार्दै उपविजेता बनेको थियो ।
