चिनी मिलहरु पुस १५ देखि संचालन हुँदै, न्यूनतम बिक्रि मूल्य अझै तोकिएन
पुस १३, २०७८
काठमाडौं । चिनी उत्पादक उद्योगहरुको संस्था नेपाल चिनी उत्पादक संघका अनुसार पुस १५ गतेबाट चिनी मिल संचालन हुने भएको छ । चिनी मिल संचालनका लागि मिति तय भई सकेतापनि उखुको न्यूनतम बिक्रि मुल्य भने तोकिएको छैन । सोहिे विषयलाई लिएर लामो समयदेखि आन्दोलनरत रहेतापनि सरकारको तर्फबाट उचित सम्बोधन नपाएको प्रति किसानहरुले दुख व्यक्त गरेका छन् ।
मिल संचालनको सम्मुख आएर मात्रै बिक्रि मुल्य तोक्ने सरकारको लक्षण देखिएको हुँदा यसबाट सरकार किसानहरुप्रति नभई उद्योगीहरु प्रति नै उदार रहेको उखु उत्पादक किसानहरुको आरोप छ । किसानलाई सस्तोमा उखु बिक्री गर्न बाध्य पार्ने गरी सरकारले अन्तिम घडीमा मूल्य तोक्न लागेको र सो मूल्य नमान्ने निर्णय महासंघले गरेको अध्यक्ष कपिलमुनि मैनालीले बताएका छन् । ‘वर्षभरि खेती गर्ने हामी उद्योगीको फाइदाका लागि मूल्य तोक्ने सरकार । अब हामीले खेती किन गर्ने ? ’ अध्यक्ष मैनालीको प्रश्न छ । किसान र उद्योगीले राखेको मूल्य र मन्त्रालयले गरेको अध्ययन एवम् अन्तर्राष्ट्रिय अभ्यास हेरेर मूल्यमा निर्णय गर्नु पर्नेमा सरकारले किसानलाई भुलभुलैयामा पारेको आरोप मैनालीको छ । मूल्य तोक्नेबारेको छलफलमा किसान प्रतिनिधिलाई तीन पटक काठमाडौं बोलाएर दुःख दिएको तर किसानको हित विपरीत मूल्य निर्धारण गर्न लागिएको उखु किसान संघर्ष समिति सर्लाहीले जनाएको छ ।
यता कृषि विभागले भने विभागबाट मूल्यको प्रस्ताव मन्त्रालयमा पेश गरिसकिएको तर मन्त्रालयले मूल्य सिफारिस गरिनसकेको कृषि सचिव गोविन्द शर्मा बताए । ‘हामीले अध्ययन गरिरहेका छौ, निर्णय भएको छैन, छिट्टै गर्ने तयारीमा छौैं,’ सचिव शर्माले भने यस विषयमा मन्त्रालयको पहल जारी छ ।
