राप्रपामा महाधिवेशन प्रतिनिधिको सूचीलाई लिएर विवाद

काठमाडौं । राष्ट्रिय प्रजातन्त्र पार्टी ९राप्रपा० मा महाधिवेशन प्रतिनिधिको सूचीलाई लिएर विवाद भएको छ। महाधिवेशन उद्घाटनको नजिक आइपुगेको अवस्थामा राप्रपाका अध्यक्ष कमल थापा र महामन्त्री राजेन्द्र लिङ्देन पक्षबीच गए राति पार्टी केन्द्रीय कार्यालय धुम्बाराहीमा विवाद भएको हो । आजदेखि हुने महाधिवेशनमा थापा र लिङ्देन पक्ष भिड्दै छन् ।

महाधिवेशन प्रतिनिधिको सूचि हेरफेर गरेको विषयलाई लिएर यि दुई पक्षबिच विवाद भएको हो । सोहि विवादका कारण आज बिहान ९ बजेभित्रमा प्रकाशित गर्ने भनिएको महाधिवेशनका मतदाताको सूची प्रकाशन रोकिएको छ । राप्रपामा कुल ४ हजार ३ सय महाधिवेशन प्रतिनिधि रहेका छन् ।

३ सय ३० प्रदेश सभाबाट चुनिएर आएका प्रतिनिधिहरुमा महिला, दलित, अल्पसंख्यक लगायतका केहि प्रतिनिधि कोटा खाली नै आएकोमा अध्यक्ष थापाले आफ्नो पक्षका नाम थप्न लगाएको लिङ्देन पक्षको आरोप छ । अनाधिकृत मानिसहरू पार्टी कार्यालयमा बसेर नाम हेरफेर गरेको पाइएकोले जिल्लाबाट प्राप्त सूची रूजु गरेपछि मात्रै मतदाता नामावली प्रकाशन हुने लिङ्देन पक्षका नेता हेमजंग गुरूङले बताएका छन् ।

राप्रपा केन्द्रीय कार्यालयका सचिव भाष्कर भद्राका अनुसार सक्रिय तथा महाधिवेशन प्रतिनिधिहरू जिल्लाबाट पठाएअनुसार नै सूचीमा समावेश गरिएको हो । मतदाता नामावली प्रकाशन लगायत काम गर्ने जिम्मेवारी भने निर्वाचन समितिलाई नै रहेको उनको भनाई छ।