कन्नाडा अभिनेता पुनीतको हृदयघाटका कारण निधन
कार्तिक १३, २०७८
काठमाडौं । कन्नाडा अभिनेता पुनीत राजकुमारको ४६ वर्षको उमेरमा निधन भएको छ ।
उनको शुक्रबार हृदयघाटका कारण निधन भएको हो । समाचार एजेन्सी पीटीआईकाअनुसार बैंगलोरको अस्पतालले अभिनेता राजकुमारको निधन हृदयघाटका कारण भएको पुष्टि गरेको हो ।
कर्नाटकका मुख्यमन्त्री बसवराज बोमईले ट्विट गरेर अभिनेताको निधनप्रति शोक व्यक्त गरेका छन् । “कन्नाडा सिनेमाका चर्चित अभिनेता पुनीत राजकुमारको हृदयघाटका कारण निधन भएको खबरले मलाई स्तब्ध बनाएको छ,” उनले लेखेका छन् ।
अभिनेता राजकुमारको निधनले कन्नाडा सिनेमा र कर्नाटकलाई ठूलो क्षति भएको भन्दै मुख्यमन्त्रीले दिवंगत आत्माको चिरशान्तिको कामना गरेका छन् । साथै उनले अभिनेताको परिवारलाई यो शोकबाट उम्किने क्षमता मिलोस् भन्दै प्रार्थना पनि गरेका छन् ।
कैयौँ राजनीतिक र मनोरञ्जन जगतका हस्तीहरूले अभिनेता राजकुमारको निधनप्रति शोक व्यक्त गरेका छन् । तमिलनाडूका मुख्यमन्त्री एमके स्टालिनले पनि ट्विटमार्फत शोक व्यक्त गरेका छन् ।
