नेपाली काँग्रेस काठमाडौंको वडा अधिवेशन आज
अशोज ५, २०७८
काठमाडौं । गत भदौ १८ गते हुने भनिएको नेपाली काँग्रेस काठमाडौंको वडा अधिवेशन आज हुने भएको छ । गत शुक्रबार बसेको जिल्ला समितिको बैठकले क्रियाशिल सदस्यताको विवाद मिलाउँदै आजका लागि अधिवेशनको मिति तोकेको थियो ।
क्रियाशिल सदस्य बढी र निर्वाचन क्षेत्र समेत धेरै भएको काठमाडौंको वडा अधिवेशनलाई अन्यत्रको तुलनामा बढि महत्वका साथ लिइएको पाइन्छ । काठमाडौंमा १० निर्वाचन क्षेत्र र २० प्रदेश निर्वाचन क्षेत्र छन् । काठमाडौं महानगरपालिकासहित ११ स्थानीय तह रहेको काठमाडौंमा १३८ वडा छन् । काठमाडौंमा कांग्रेसका ३० हजारभन्दा बढी क्रियाशील सदस्यहरु छन् ।
कांग्रेसको वडा अधिवेशन गत भदौ १८ गतेदेखि शुरु भएको थियो । करिब नौ लाखको संख्यामा रहेका कांग्रेस क्रियाशील सदस्यहरु पार्टीको वडा अधिवेशनका मतदाता हुन् । क्रियाशील सदस्यहरुले आफ्नो वडाको वडा समिति र क्षेत्रीय प्रतिनिधि चयन गर्छन् । कांग्रेसले गाउँरनगरपालिका अधिवेशन असोज ९ गते, प्रदेशसभा क्षेत्रीय अधिवेशन असोज १२ गते र प्रतिनिधिसभा क्षेत्रीय अधिवेशनरएक मात्र प्रतिनिधिसभा निर्वाचन क्षेत्र भएको जिल्ला अधिवेशन असोज १५ गते निर्धारण गरेको छ ।
त्यस्तै एकभन्दा बढी प्रतिनिधिसभा निर्वाचन क्षेत्र भएको जिल्ला अधिवेशन असोज १८ गते, प्रदेश अधिवेशन कात्तिक १० देखि १२ गतेसम्म र केन्द्रीय महाधिवेशन आगामी मंसिर ९ देखि १३ गतेसम्म तय गरिएको छ ।
