नेपाली कांग्रेस धादिङको जिल्ला सभापतिका लागि चर्चा शुरु, चार नेताद्धारा दाबी पेश
भदौ २९, २०७८
धादिङ । धादिङका १ सय ४ वटा वडाहरुमा नेपाली कांग्रेस धादिङको वडा अधिवेशन सम्पन्न भएसँगै जिल्ला सभापतिका लागि चर्चा शुरु भएको छ । जिल्ला सभापतिका लागि चार जना नेताहरूको दाबी परेको छ ।
नेपाली काँग्रेस धादिङका नेता, पूर्वसांसद एवम् पूर्व सभापति रामनाथ अधिकारी, नीलकण्ठ नगरपालिकाका मेयर भीमप्रसाद ढुंगाना, पूर्वमन्त्री दिलमान पाख्रिन र वर्तमान जिल्ला सभापति रमेश धमलाले सभापतिमा दाबी गरेका हुन् । १३औँ महाधिवेशनमा धादिङमा महामन्त्री शशांक कोइराला निकट मानिने रमेश धमलाले ढुंगानालाई २६ मतले पराजित गरेका थिए ।
जिल्ला अधिवेशनका बेला उम्मेदवारी दिने क्रममा ढुंगाना र पाख्रिनमध्ये एकजनाले सभापतिमा उम्मेदवारी दिने सम्भावना देखिन्छ । एकले अर्कालाई राजनीतिक रुपमा यसअघि पनि सहयोग गर्दै आएका यि २ नेताहरु एकअर्काको निकट रहेको मानिन्छ । ढुंगाना र पाख्रिन मिल्ने नेताहरू हुन् । एकले अर्कालाई राजनीतिमा सधैँ सहयोग गर्दै आएका छन् । अधिवेशनमा सभापति एवम् प्रधानमन्त्री शेरबहादुर देउवाको समूहबाट ढुंगाना र पाख्रिनको नाम चर्चामा रहेको हो ।
यता नेता रामचन्द्र पौडेल समूहबाट पूर्व पार्टी सभापति अधिकारी र हालका सभापति धमलाले उम्मेदवारी दिने चर्चा रहेको छ । करिब २ दशक लामो राजनीतिक यात्रामा नेतृत्व गरिसकेका अधिकारी यसअघि २ पटकसम्म पार्टी सभापति भईसकेका छन् । धमलाले पनि पार्टी सभापतिमा दोहो¥याउन उम्मेद्वारी दिन खोजेका हुन् । सभापतिमा उम्मेदवार बन्न चाहेकाहरूले प्रचार प्रसार समेत गर्न थालेका छन् ।
