नागढुंगा-नौबिसे सडक खण्डमा पहिरो, राजधानी भित्रिने र बाहिरिने सवारी नाकामै रोकिए
भदौ १३, २०७८
काठमाडौं । अविरल वर्षासङ्गैको पहिरोका कारण काठमाडौंको नागढुंगा नाका नजिकको त्रिभुवन राजपथको नागढुंगा – नौबिसे खण्ड अवरुद्ध भएको छ । उपत्यका छिर्ने मुख्य नाका अवरुद्ध हुँदा हजारौं यात्रुलाई समस्या भएको छ ।
चिसापानी धारो नजिकको पहिरोका कारण आज बिहान करिब ९ बजेदेखि सो सडकखण्ड अवरुद्ध भएको हो । राजधानीबाट बाहिरिने र भित्रिने सवारी साधन सबै रोकिएका छन् । निरन्तरको वर्षाका कारण पहिरो पन्छाउन समस्या भएको महानगरीय प्रहरी प्रभाग थानकोटले जानकारी दिएको छ ।
अहिले पहिरो पन्छाउने कार्य लगभग सकिन लागेको बताइएको छ । यद्यपी निर्माणाधीन सुरुङमार्ग सिस्नेखोला नजिकको सडकखण्ड माथिको पहिरोका कारण यात्रा जोखिम र कष्टप्रद बनेको छ ।
