धादिंग र काठमाडौंमा एक पछि अर्काे गरी श्रीमति हत्याका घटना, आफ्नै श्रीमानद्धारा मारिँदै महिलाहरु
साउन २०, २०७८
काठमाडौं । धादिङको बेनिघाट रोराङ गाउँपालिका–२ ताल्तीमा कोदालोले हानेर एक पुरुषले श्रीमतीको हत्या गरेका छन् । ताल्ती हुरेका ४५ वर्षिय तीर्थबहादुर वि.क.ले ४२ वर्षिया श्रीमती भीममाया वि.क.को हत्या गरी आफुले झुण्डिएर आत्महत्या गरेका छन् ।
सोमबार बिहान सामान्य विवाद पछि घरबाट निस्किएका तीर्थबहादुरले केहि समयपछि पुन: घरमा आएर श्रीमतिलाई खेतमा काम गर्न जाम् भनि लगेका थिए । करिब ७ सय मिटर पर पुगेपछि पछाडिबाट कोदालोको पासोले प्रहार गरि हत्या गरेको प्रहरीले जनाएको छ । लगत्तै उनले आत्महत्याका लागि डोरीमा झुन्डिएको र सो डोरी चुँडिएपछि श्रीमतिकै सलमा झुण्डिएर आत्महत्या गरको बताइएको छ ।
घटनास्थलमा मृतकको साथमा सुसाइड नोट समेत भेटिएको प्रहरीले जनाएको छ । तीर्थबहादुरले पूर्वयोजनाकै आधारमा भीममायाको हत्या गरी आफुले समेत आत्महत्या गरेका प्रारम्भिक अनुसन्धानबाट खुलेको र थप अनुसन्धानका लागी महाराजगञ्जस्थित टिचिङ अस्पताल पठाइएको इलाका प्रहरी कार्यालय गजुरीका डिएसपी युवराज खड्काले बताउनुभयो । नीजहरुको ४ छोरा र १ बुहारी रहेका छन् ।
यता काठमाडौंको चौमतिमा मध्यरातमा घाँटि थिचि श्रीमतिको हत्या गरेको आरोपमा बुधबार एक पुरुषलाई प्रहरीले पक्राउ गरेको छ ।
खोटाङ घर भई काठमाडौंको चौमति बस्दै आएका ३८ वर्षिय रामेश्वर गोतामेले २८ वर्षिया श्रीमति बबिता राईको घाँटी थिचेर हत्या गरेको भन्ने स्थानीयको खबर पाएलगतै पक्राउन गरिएको प्रहरीले जनाएको छ ।
नीजहरु विगत ५ महिना देखि चौमतिमा डेरा गरी बस्दै आएको र दुबैजना बालाजुको औद्योगिक क्षेत्र भित्रको चप्पल कारखानामा काम गर्ने गरेको बताइएको छ । बालाजुका प्रहरी नायब उपरिक्षकका अनुसार पाँच वर्ष अघि विवाह गरेका रामेश्वरको बबिता दोस्रो श्रीमति हुन् ।
आफुहरुबिच पहिलेदेखि नै राम्रो सम्बन्ध नभएको र श्रीमतिले सधैं रक्सि खाएर चक्कु देखाउने गरेका कारण बरु मारेर जेल बस्छु भनेर घटना घटाएको देखिएको र घटनापश्चात् पनि उनमा कुनै पश्चाताप भाव नभेटिएको प्रहरीले जनाएको छ ।
