कोभिड–१९ सम्बन्धी खोपहरु विश्वव्यापी सार्वजनिक वस्तु हुनुपर्छः प्रधानमन्त्री ओली
मंसिर १९, २०७७
काठमाडौं । प्रधानमन्त्री केपी शर्मा ओलीले कोभिड–१९ सम्बन्धी संयुक्त राष्ट्रसंघको विशेष महासभालाई सम्बोधन गर्नुभएको छ । सो सभालाई सम्बोधन गर्दै ओलीले सम्पूर्ण मानव समुदाय नै संकटमा रहेको समयमा जीवन रक्षाका खोपहरु अधिकतम नाफाको माध्यम हुन नसक्ने बताउनुभयो ।
‘कोभिड–१९ सम्बन्धी खोपहरु वास्तविक रुपमा नै विश्वव्यापी सार्वजनिक वस्तु हुनुपर्छ जसमा सबै मुलुक र जनताको लागि सहज पहुँच र उपलब्धता हुनुपर्छ ’ ओलीले भन्नुभयो । विश्व महामारीबाट सुरक्षित हुन विश्वव्यापी रुपमा नै खोप उपलब्ध हुनुपर्ने उहाँको भनाई छ । संसार सानो डुंगा भएको र हामी सबै यसको यात्रु हो भन्दै प्र.म. ओलीले अहिलेको संकटले पाठ सिकाएको बताउनुभएको छ ।
हाल कोभाक्सले विश्वभरी नै खोप पुर्याउन गरिरहेको पहलको ओलीले स्वागत समेत गर्नुभएको छ । कोभिड–१९ लाई कै केन्द्रित गरेर राष्ट्रसंघले आयोजना गरेको विशेष महासभाको लागि प्रम ओलीको सम्बोधनको भिडियो रेकर्ड गरी राष्ट्रसंघ पुर्याइएको थियो ।
